Simbang Gabi ni Mang Tinong Sintu-sinto

ni Weng Bava, SJ

Alas tres treinta ng umaga
Nagsisimulang gumising
Ang mga kaluluwang pagal
Sa maghapong paggawa
At pagbubungkal
Na kung anu-anong maaaring
Ipantawid gutom
O ibalabal man lang
Sa katawang nanginginig
Sa ginaw at nanlilimahid sa
Hilahil

Sa sulok niyang angkin
Matatanaw ang yayat niyang
Katawang hinahagupit ng sasal
Ng ubo ng tuberculosis
Subalit matamang nakamasid
Sa patay-sinding liyab ng
Isang libo’t isang bumbilyang
Pula
Berde
Asuldilawputi
Kumikislap ang mga matang
Wala ni isang pikit
Manghang-mangha sa grupong
Nakapalibot sa sanggol na hubad

Ito ang hari, ito naman ang prinsipe
Narito ang duke, ang pastol at ang mga ale
Sa banda roon may kabayong ngumunguya
Sa kanan ay tupa o kambing yata
Ang mag-asawa, nahihiya sa mga bisita
Sa bubong naman ay may anghel
Kumpleto na, kumpleto na!

At ako, ako ang tagapalis ng langaw
Tagabugaw ng lamok na magtatangkang
Lumapit sa Niñong Bathala

Titilaok ang manok, babalik sa kama
Ang mga nagsipamili ng puto bungbong
At siya, magbabantay, maghihintay
Hanggang magsimbang gabi muli
Mamaya, mamaya